حسبي الله عليك يا بو رمية جانك بتقلب الديره عليننا

آنا ماني عارفه اللي ينقال له بو رميه هذا شنو هدفه بالدنيا ..؟

طلعلنا بسالفة القروض و شط عمره علشان يطيحون قروضه و المساكين اللي عليهم الف و الفين ما يدرون ان قروضهم ما تساوي شي عند قروض الأخ العزيز اللي قاعد يطالب باسقاطها و ما يدرون ان كل هالحماس علشان مصلحته ..

خلينا سالفة القروض طلعلنا بسالفة البدون ..

أول شي آنا مو ضد حقوق البدون و بالعكس آنا مع اعطائهم حقوقهم لأنهم بالنهايه بشر حالهم حال أي هندي و الا مصري له حقوق و سفارة يلجأ لها متى ما احتاجها ..

مشكله البدون متشعبه و عويصه على قولتهم و اعتقد ان كل حل أمر من الثاني لأن البدون اللي فعلا يستحقون التجنيس قليلين مثل ما كلنا انعرف و الباجي كلهم لفوو عليننا من هالدول القريبه ..

شلون انفرق بين الأثنين ماني عارفه الصراحه و شلون نقدر ان نعطي المستحقين و نفصلهم عن الحوش الباجي هم ماني عارفه ..

و شنسوي في عوير و زوير اللي قطو جناسيهم و يوننا مادري .. انقطهم في البحر و الا انحطهم في صاروخ و اندزهم القمر ..؟

المهم مو هاذي سالفتنا ..

سالفتنا بو رميه اللي مسويه نفسه المدافع عن الحق و تصريحاته بحشد 100 الف بدون في ساحة الاراده للضغط على الحكومه ..!

ما ادري هالبو رميه هذا شنو ناوي عليه اللي بيمّع 100 الف بدون عند المجلس ..

الصراحه زين ما سوو الداخليه لأن من المعروف ان عدد مو قليل من فئة البدون "خريجين سجون" و هالشي ما عرفته باحصائيه لكن الجرايم اللي انشوفها يوميا من سرقات و غيرها البدون يلعبون فيها دور كبير و طبعا آنا اتكلم عن البدون الحوش مو اللي يستحقون و انظلموا ..

فـ شنو نتوقع من 100 الف شخص من هالفئه في مكان واحد و شنو ممكن يصيير ..؟

الداخليه عندها معلومات بأن ممكن تصيير تفجيرات و هالشي مو غريب اذا فعلا صار هناك حشد لأن في ناس مو خسرانه شي و اذا كانت اصلا عليه قضايا و بلاوي ف حياته اصلا مو هامته سهل عليه ان يقوم في مثل هالاعمال ..

و حتى لو ما صار تفجيرات احتمال كبير تصير مشاجرات و مشاكل و هذا شي مو مستبعد كلش ..

فـ الله يحط كيدهم في نحرهم و الله لا يوفقك يا بو رميه اذا ناوي تزعزع الأمن عندنا ..

و الله يحفظ الكويت انشالله ..

Anfal

كارثه جداويه

أنشغلت في الأيام الماضيه مع الأهل و لوية "العيد" و الطلعات و من بعدها الدوامات

و النوم في هالجو البارد و .. و .. الخ

المهم ان العقل كان مشغول بعد في أمور ثانيه و ما لقيت او ما فكرت اصلا في موضوع اكتب عنه ..

اليوم بعد الاجازه اللي خذاها مخيخي "على ما اعتقد الأيمن" رجعت اقرأ بعض المواضيع من هني و هناك ..

الموضوع اللي فعلا لفت انتباهي و انقهرت عليه موضوع خارج ديرتي الغاليه

(اللي يقول الديره مافيها مشاكل يعني علشان اطلع بره)

المهم ان قبل فتره سمعت اخبار و قريت بعض المواضيع اللي تكلمت عن امطار جده و شلون انها غَرّقت المدينه ..

اليوم شفت صور و تعجبت مما رأيت لأن ما توقعت انها وصلت لهالدرجه

خصوصا ان التغطيه الاعلاميه للموضوع كانت جداً بسيطه و جنه الموضوع "طبيعي" و take it easy

اللي يشوف الصور يقول هاللي صاير يا اما في بغلادش و الا سيلان !

معقوله دوله نفطية من أغنى الدول عندها مشكلة صرف صحي من سنين "الطواعين"

و المشكله توصل لحد وفيات بهذا الرقم الكبير اللي حسب كلامهم وصل 1700

و الاعلام عندهم يعرض التقارير على ان الموضوع الله يرحمهم "قضاء و قدر"

و احنا ما بيدنا شي انسويه و نقطه عالسطر !

على كثر ما التهينا في مشاكلنا الداخيه "كدت" ان انسى ان العالم العربي كله يغرق في نفس المشاكل

و ربما اشد و امر من مشاكلنا ..

الفرق ان الشعب الكويتي يقدر يتكلم و يحتج و يصارخ و يحذّف "قواطي!" و شعبهم مكمم الأفواه ..

ليش الشعب العربي تعود على عيشة الذل و السكوت عن الحق

و الشعب الغربي المحكمه عنده مثل الجمعيه رايح راد عليها !

ليش الشعب الغربي تعود على التفاني في العمل

و الشعب العربي تعود على البوقات و الرشاوي و الواسطات و دهن السير ..

سبحان الله حتى مصطلحات البوق و الرشاوي عندنا لهم قاموس خاص من كثر ما تنوّعت و تعددت و تفرّعت و قاموا يتفننون فيها ..

الله يعينكم على ما ابتلاكم و يصبر اهالي الضحايا ..

يقولون ان تم تشكيل لجنه محاسبة المسؤولين ..

تهقون يصيرون احسن مننا و يحاسبون مسؤولينهم فعلا ...؟

و الا اللجنه شكل حالها حال لجاننا التعبانه ..؟

ما اقول الا الله يعيننا و يعينكم و المشكله الظاهر لا في الكويت ولا في السعوديه

المشكله الظاهر ان العقول العربيه المسؤوله في الدول العربية جميعها "مصينه" و غير صالحه للإستخدام اصلا ..!

اترككم مع صور تبين حجم الكارثه ..

لا حول ولا قوة الا بالله !

Anfal

انحطاط رياضي

ما راح أأسف على حال الرياضة الكويتية لأنه اذا حالنا بالسياسة تأزيم فشنو تتوقعون من حالنا بالرياضة بنزدهر ونصك على البرازيل وايطاليا مثلا ..

احنا اذا النواب يضربون بالقوانين عرض الحائط فعادي انه الموظفين من اصغرهم لي اكبرهم بيسون نفس الشي هذولي المشرعّين خواره يعني لا بنكون طبنا ولا غدا الشر ..

بس انا متفاجئ للأمانة من واقع الرياضة وخصوصا في مباراة مصر والجزائر والشغب اللي صار من المنتخبين وجمهورهم يعني وصلنا لي مرحلة انه امور العنف بدت تتفشى بالجسم الرياضي وانعكست على علاقات الدولتين حتى انا سامع بمصر تدرس قطع العلاقات الدبلوماسية بينها وبين الجزائر ما اقول الا يا ساتر ..

مادري اذا شفتوا اللاعبين الجزائرين واهما مصابين وسمعتوا بالمصابين المصريين في السودان وحتى أحداث العنف وصلت لي فرنسا !! شالسالفة تراها رياضة وبالاخص كرة واحنا نبارك للفايز ونقول هاردلك للخسران ونتقبلها بروح رياضية بس للاسف هالامور انفقدت والمشكله انه ننقد على الجماهير الاوروبية على الشغب واحنا ما نشوف حالنا ..

و الاحداث اللي صارت في مباراة الكويت واندونيسيا بدايتها انطق بدر المطوع نقول ما يخالف احداث مباراة بعدين تطورت بين اللاعبين ما يخالف تصير باحسن المنتخبات لكن نشوف بعد واحد من الجمهور الكويتي يتعرض للضرب من الجمهور الاندونيسي وللاسف انه الاربع دول اللي ذكرتهم دول مسلمة والمفروض يتحلون بالتسامح والرحمة لكن دوام الحال من المحال والله يخلف علينا

Kefy_Q8y

مأجج الطائفية

للأسف أنه يطل علينا كل يوم جديد من أشباه الكتّاب اللي يكتبون في جريدة يومية طائفية مثل جريدة الدار أنا ما راح أطول بالمقدمة عن الحديث على هالكاتب لأنه ما يستاهل أنه أسويله مقدمة بالكلام ..

الكاتب اهو فرج الخضري وطبعا راح أتناول في موضوعي مقتطفات من مقالاته وبتشوفون شلون الغمز واللمز في كلامه واضح وبعض الأحيان بالويه وللأسف انه هالأشكال قاعدة تزيد يوم بعد يوم وبنهاية المقال ان شاء الله بحط لكم اللنك اللي يجمع مقالاته التعيسة.

بالبداية لتناول مقالته واللي بعنوان (تجمع ثوابت الشيعة) كانت في تاريخ 27-10-2009 ولاقتبس بعض من كلامه:

حسب رأيي أن من أهم هذه الإنجازات هو إيقافنا للأجندة الطائفية السرية للتكفيريين والخاصة بشيعة الكويت. فنحن والحمدلله استطعنا أن نخترقهم وأن نحصل على هذه الأجندة السرية.

طبعا يرمي في كلامه أنه تجمع ثوابت الشيعة اهو اللي اخترق والصراحة يذكرني بأفلام جيمس بوند شلون يحدثنا عن الاختراق وأنه حصل على الوثائق المهمة وهذا من نسيج خياله طبعا لأنه سهلة كلمة حصلت على ولكن كلمة اثبت بالدليل صعبة على وايد ومنهم أشباه الكتّاب اللي اهو من ضمنهم.

خلونا نكمل اقتباس:
فأحد بنود هذه الاجندة «السوداء» هو: محاربة علمائنا وخطباء المنبر الحسيني عن طريق مضايقتهم ومراقبة مجالسهم ورفع القضايا تلو القضايا عليهم وتكفيرهم وزندقتهم والضغط سياسياً لإبعادهم عن البلاد، كما فعلوا مع السيد محمد باقر الفالي وابتدأوا بالشيخ حسين الفهيد والشيخ عبدالحميد المهاجر وغيرهم.

هذي بداية اتهاماته وانا ما أسميها اتهامات أسميها حقائق لأنه ناس مثل حسين الفهيد وعبدالحميد المهاجر ناس لهم تسجيلات صوتية ومرئية لسب الصحابة رضوان الله عليهم والأكاذيب المغلوطة يعني فعلا ناس ما تستحي وتبينا فوق هذا نخليهم يسرحون يمرحون ونخليهم على راحتهم شنو هالكره والبغض والقلوب السودا احنا ما نبي نتكلم عن اختلاف المذاهب والأفكار لكن نتكلم عن شوي احترام اذا انت وامثالك من أشباه الكتّاب فقدتوها.

خلونا نكمل:
وكذلك من بنودهم التوسع في عملية التبشير التكفيري والتركيز على الشباب في المدارس والجامعات والمعاهد التطبيقية وتحويلهم للمذهب التكفيري.


يعني يتهم اللي يخالفه بالتبشير التكفيري وهالكلمة وايد نسمعها هالأيام صارت مصاخة يتهم المجموعة الكاملة بخطأ مجموعة صغيرة يعني بالكويتي يدور الزلة فيقول أنه الجميع تكفيريين وهذا جهل منك يا شبه كاتب وأنا اقوله شوف نفسك قبل لا تهاجم غيرك وارجع للتاريخ خل يعلمك منو أصحاب الفكر التكفيري ومنو اللي يبون يفجرون بمكة المشرفة هذه المدينة اللي دمعت عينا الرسول صلى الله عليه وسلم على وداعها وأنت اليوم تتهم غيرك بالتكفيريين وارجع على اللي خطف طائرة الجابرية وارجع على تفجيرات القهوة الشعبية اللي كان مستهدف فيها الشيخ جابر رحمة الله عليه وارجع لي قريب عن تأبين مغنية يعني الصراحة كل هذا ومو تارس عينك أنت ما يترس عينك ألا التراب المشكلة أن جميع الأحداث اللي ذكرتها توني كانت تستهدف شريحة المسلمين بشكل عام والكويتيين بشكل خاص لكن لو بترجع على كلامك يا الخضري للأحداث من أصحاب الفكر التكفيري ترى الأغلب (ونركز على كلمة الأغلب) كانت على غير المسلمين لانه في ناس أدري بتقول وجهيمان لما دخل الحرم فأنا ذكرت بالبداية أنه في مجموعة صغيرة تخطأ وتبتعد عن الطريق السليم لكن ما نعممها فانصفت الجميع بهالنقطة مو مثلك يا شبه كاتب.

والمقالة أتمنى تقرونها وتشوفون أنه النقاط اللي ذكرها كلها اتهامات من أزل الأزلين يتهمون فيها السنة يعني ما قال شي يديد أو مثير للدهشة لأنه من زمان نسمع هالحجي فلا يسوّي فيها أنه حدث اختراق وأدلة سرية لأنه حجي فاضي.

المقالة الثانية كانت بعنوان (شيعة الكويت .. والأمريكان) بتاريخ 2-11-2009 ولنتقبس:

(أفاد التقرير أن السنة في الكويت يمثلون 70 في المئة بينما يمثل الشيعة 30 في المئة من إجمالي عدد السكان). المعلومات المؤكدة لدي تقول ان الحكومة الكويتية لديها نسبة (سرية) لعدد شيعة الكويت تفوق الـ 30 في المئة، ولكن النسبة الحقيقية للمواطنين الشيعة هي 40 في المئة، فكثير من أبناء القبائل لا يظهرون تشيعهم لأسباب عديدة، وهم يعدون بالآلاف.

مثل ما ذكرت قبل شوي يحسسني أنه عايش بحرب وفي تجسس وسرية هالحجي الباصج والماصخ يعني غصب بيوصل عدد الشيعة فوق وانهم قرّبوا يساوون عدد السنة في الدولة وأنا أقوله لو هذا صج شلون عرفت انه الكثير منهم ما يقولون انهم تشيعوا !! شلون تأكدت من النسبة يعني المفروض لما تقول هالحجي تكون قاعد معاهم عارفهم متأكد منهم مو بس حجي تقطه وتمشي بس اهو الصج انه الكلام سهل دامك تعممه والنقطة الثانية لو صج انه آلاف من أبناء القبائل من الشيعة فالمفروض ما نشوف بالدائرة الرابعة والخامسة جميع النواب بلا استثناء قبليين وخلنا من الفايزين المشكلة حتى باللي ساقطين بالمراكز المتقدمة كلهم من ابناء القبائل وعشان ننصف احنا ما ننكر انه ما في من أبناء القبائل شيعة لكن مو بحجم المبالغة اللي أنت سويتها يا شبه كاتب.

نكمل كلامه:

(ان الحكومة فرضت قيودا على حق الممارسة الدينية الحرة، ذاكرة أن عددا من أعضاء الطائفة الشيعية عبروا عن قلقهم ازاء الندرة النسبية للمساجد الشيعية بسبب البطء الحكومي في الموافقة على بناء مساجد شيعية جديدة وترميم القائم منها، هناك 35 مسجداً شيعياً مقارنة مع أكثر من 1100 من المساجد السنية في الدولة، وأنه منذ عام 2001 منحت الحكومة تراخيص وموافقات لبناء ستة مساجد شيعية جديدة).

فالرد أنه هالدولة سنية وأحمد ربك حاصلك مساجد وحسينيات أنت روح شوف ايران اللي تاخذ أفكارك وتدز عيالك يتعلمون منها ابرك من اهني كما ذكرت في مقالتك وراح اتطرق لها بعد شوي , شوف حال السنة شصاير فيهم وشلون يتعذبون وينهانون ليش أنهم من اتباع المذهب السني فلا مساجد ولا حلقات توعوية ولا مراكز هذي العدالة اللي أنت تتكلم عنها أنت لما تذكر العدالة والمساواة في الحقوق والواجبات مو معناتها أنه تحط راسك براس السنة إذا على جذي الطائفة المسيحية نحط لها نفس الكنائس من باب العدل والمساواة والهندوس والمجوس , لو بتتكلم عن العدل والمساواة فانت تاخذ القرض وتتعلم وتتعالج ببلاش وما تدفع فواتيرك الكهربا وتدز عيالك على حساب الدولة يتعلمون وياخذون شهاداتهم والحكومة تتكفل فيهم لي تزوجوا سواء بالقرض أو الأرض ما تفرق بين مذاهب لكن انت بس تشوف لي طرف صبعك وتحاول تخلق مشكلة من سراب واللي مو عاجبه يرد من مكان ما يه سواء كان تهريب أو سباحة.

نكمل:

(وأوضح التقرير أن الشيعي الكويتي الراغب في العمل كإمام أو رجل دين عليه أن يتعلم في العراق أو إيران واحياناً سورية بسبب قلة المناهج الدراسية للشيعة في كلية الشريعة جامعة الكويت).

وكما ذكرنا أنه أساس هالدولة دولة سنية مو ملزومين فيك بنعلمك ونعلم عيالك التبرك بالقبور والاحاديث عن الأئمة المعصومين إذا تبي دز عيالك بره خلهم ياخذون الأفكار واللعن والسباب ويرجعون لنا لكن شوفوا شنو يقول الكاتب في تكملة المقال:

بل إن المناهج الدراسية الشيعية معدومة في كلية الشريعة، وما يدرس في كلية الشريعة هو المنهج السلفي، وأقول دعوا شبابنا يدرسون في قم والنجف (أبرك)، بدل أن يتخرجوا من كلية الشريعة ويكون أول شيء يفعلونه هو تكفير أهاليهم وطائفتهم لأنهم «رافضة ومبتدعة ومشركون».

أكثر من هالوقاحة بعد يعني جميع من يتخرج من كلية الشريعة متزمتين ولهم الغلو في الدين ولله الحمد الغلو في الدين مو عندنا شوفه موجود وين يا شبه كاتب وطلابنا قاعدين يمسكون المناصب بفكرهم السليم والقويم يفتحون هالقنوات التوعوية والدينية يروحون لدول الخليج والدول العربية في شهر رمضان كريم بدعوة من الدول نفسها لصلاة التراويح والقيام يعني لو ما وصل صيتهم وسمعتهم الطيبة لي هالدول جان ما طلبوهم وعلى الأقل ما نسمع منهم السب واللعن لأحد لكن مشكلة اللي يشوف من عين وحدة فأنا اقول اي والله ابرك يدرسون بقم والنجف ولو يقعدون اهناك ما يرجعون وايد أبرك احسن من استيراد أفكار هدامة ما وراها اللعن والسب والشتيمة.

والكاتب للاسف اختتم المقالة بسطر بسيط ولكن يحمل بطياته الكثير والمعنى الخطير:

وأخيراً أقول الله يعين شيعة الكويت ويوسع صدورهم، لأن (آبار الصبر) تكاد أن تنفد..!

الكل عارف معنى الجملة بس انا أقوله انه الحمدلله عشنا وتربينا تحت مظلة الشيوخ اللي كان العدل اساسهم وما فرقوا بين سني وشيعي وانت بنفسك ذكرت في مقالات لك انه كانت هناك مساعدات من الأسرة الحاكمة لبناء أول حسينية في الكويت وترميمها لكن أنت وأمثالك من أشباه الكتّاب اللي يحاولون يخلقون الفتنه والطائفية من لا شئ ويحاولون يبينون أنه الشيعة مستهدفين وهناك قمع لهم خاصة في الردود على مقالاتك نشوف شلون التجاوب معاك أنه في قمع واستهداف لهم وهذا والله زيف انتوا اختلقتوه لكن ما أقول الا لا تجذب الجذبه وتصدقها أحمد ربك على الديموقراطية اللي خلتك تقول هالكلام لو انت بديرة ثانية جان أهلك لي الحين يدورونك هذا اذا مو انت وأهلك مفقودين.

للأسف وأكررها للأسف أنه يطلون علينا أشباه الكتاب وأنا للأمانة ما تطرقت لهالموضوع للمساس أو التجريح بالطائفة الشيعية اللي نكن لها جميع الأحترام والتقدير ولكن للرد على أشباه الكتاب لأنه سكوتنا عنهم بمثابة الموافقة على كلامهم والساكت عن الحق شيطان أخرس.

اكتفي بالرد على هالمقالتين واللي يبي يطّلع على مقالاته الثانية فاللنك موجود بالأسفل.

http://www.aldaronline.com/AlDar/AlDarPortal/UI/Author.aspx?AuthorID=192

Kefy_Q8y

والله عيب

(أقام تجمع صوت الكويت احتفالية بمناسبة مرور 47 عاما على وضع الدستور الكويتي باعتباره وثيقة أسست مبادئ العلاقة بين المواطنين وحددت حقوقهم وواجباتهم وفق مفاهيم العدل والمساواة) لي اهني الخبر زين ومن أحلى ما يكون من حقهم هالتجمع الطيب يحتفلون ويستانسون بس العيب أنه لما نسمع من نواب سابقين من أمثال النائب عبدالله النيباري أنه يرمي الدستور احتجاجا على عدم الألتزام بمواد الدستور فهذي مو حلوة لا بحقك ولا بحق الدستور اللي أنت بيوم اقسمت على حمايته وحماية مواده ويوم ما صرت خارج التشكيلة النيابية قمت ترمي الدستور وهذي مو حلوة بحقك شخصيا ومو حلوة لتاريخك النيابي ..

أغلب المشاركين في تجمع صوت الكويت كانو من المنبر الديموقراطي سواء أسيل العوضي رولا دشتي وعبدالله النيباري ومجموعه من الشباب واليهال اللي قاموا يقطون الدستور مستانسين على السالفة .. هالدستور اللي عن طريقه قدرتوا تنضمون هالاحتفالية وهالدستور كفل لكم حرية الرأي اللي تتمتعون فيها لكن للأسف انه مو كفو ديموقراطية لانكم تهينون نفسكم قبل لا تهينون الدستور ..

أنا إذا اختلف معاك فهذا شي طبيعي لكن لما تشوف الدستور ما يخدم مصالحك تقوم وترميه فهذا نسميه قلة أدب فالعتب قبل لا يكون على يهال وشباب صوت الكويت يكون العتب على النواب اللي مشاركين رغبة بهالجم صوت من اللي مخهم ينفر بكلمتين وشويه ترزز ولقطات جدام الكاميرا .. أخيرا وليس أخراً النائب عبدالله النيباري أنا أقول ما بقى بالعمر كثر ما مضى وأنت حاولت بشتى الطرق تنجح لكن للأسف ربعك ما يبونك وتخبطكم شتتكم فأقول استريح وريّح

تنويه: بآخر كل موضوع يكون اسم كاتب المقالة فأرجو من الأخوان اللي بيردون

ينتبهون على هالشغله لأني لاحظت بالمقالتين اللي قبل كانوا رادين على الأخت انفال

والموضوع كان تابع لي ويعطيكم ألف عافية.

Kefy_Q8y

بهارات زين

كما عودتنا شركة زين للاتصالات أن تطل علينا بأعلاناتها الجميلة سواء في رمضان أو غير رمضان بس ما لفت نظري الصراحة الأعلان الأخير لها على قناة الوطن مثل ما انتو شايفين بالفيديو أعلان هندي وهالأعلان توه طلع علينا بعد ما سمعنا حجي وكثرت الأقاويل على نية بيع 46 % من أسهم شركة الزين وطبعا هالحجي بس نسمع فيه وما نشوفه ..


طبعا ببداية الموضوع طلعت أشاعة ويا كثر الأشاعات في هالبلد على أنه الشركة انباعت لتاجر ماليزي وشركات هندية وكذلك الأشاعة لبيع حصة زين في افريقيا والظاهر الله أعلم عشان ما أحط بذمتي أنه يلعبون بالسهم فوق وتحت من خلال بث هالأشاعات بالديرة خصوصا بعد ما أطل علينا السيد ناصر الخرافي اللي الصراحة ما نشوف أي هجوم الا وكان هو المدافع خاصة في الدفاع عن صاحب النصر الإلهي المهم ما علينا يقول في تصريحه وخلوني اقتبس:

"أكد رئيس مجموعة الخرافي ناصر الخرافي أن المفاوضات مستمرة مع الجهات الراغبة في شراء حصة 46 في المئة من شركة زين للاتصالات مؤكدا أنه لن يقبل بسعر أقل من دينارين لسهم زين."


وفي تصريحه كذلك ذكر أنه آسف للأشاعات والمهاترات وانه يحاول أن ينعش الأقتصاد الكويتي ببيع هذه الصفقة مو عشان ينعش اقتصاد مجموعة الخرافي الصراحه بسنا حجي فاضي ولعب على عقول الناس يعني السهم ارتفع من بعد هالتصريحات والأشاعات يعني لي هالدرجة استخفاف بعقول الناس .. أنا ما ألومه إذا كان يبي يبيع شركة زين لأنه بالأخير اهو يشوف الأنسب له لكن طريقة تداول الموضوع صارت فيها مصاخة للأسف ماكو شركة بالعالم ما قالوا راح تشتري زين يعني الموضوع خذا وقت طويل واكبر من حجمه والاستفادة زادت من ورا هالسالفة ..

الآن خلونا ناخذ الرد الثاني للسيد ناصر الخرافي:-

"ناصر الخرافي: بنوكنا ستستفيد من الـ 14 مليار دولار في معالجة رهوناتها
لم يكن بودي أن اتطرق مجددا لموضوع صفقة زين، فقد أوضحت رأيي بصراحة في البيان الذي بثته محطة سي ان بي سي عربية، غير اني وجدت لزاما علي أن اوضح الحقائق للرأي العام الكويتي خاصة في ظل التطورات التي تشهدها الساحة المحلية والتي بلغت حد الاضرار بالصفقة، وبالتالي الاضرار بالاقتصاد الكويتي الذي يترقب نجاحها، لما فيها من فوائد عظيمة على الاقتصاد عامة، والسوق المالي بصفة خاصة"


هذا كان جزء من تصريحه واللي الصراحة ما شفنا منها فايدة لي الحين ولا عايدة من ورا هالصفقة .. الدول اللي تضررت أكثر منا في أزمة الاقتصاد الأخيرة تداركت الأمر وحطت لها خطة مشيت عليها وبغضون نهاية هالسنة يكون تجاوزت المحنة واحنا اللي ما حاشنا الا طشار منها لي الحين نعاني الصراحة ونعم التخطيط ونعم القول ونعم الفعل ..

طبعا عنوان المقالة أنا بتركه لتفسيركم لأنه يفسر باكثر من طريقة ولكن لزاما علي أوضح معلومة اضافية وهو أنه شركة هندية اسمها بهارات سانتشار نيجام قاعده تفاوض لشراء حصة زين فالظاهر شركة زين شافت من الأسهل عليها اجراء المفاوضات بالدعايات وطلت علينا بدعايتها الهندية ..

الحين خلونا لو فرضنا واسلمنا انه شركة زين انباعت شنو راح يكون تداعيات البيع مثل ما قال الأخ ناصر الخرافي أنه البنوك بتستفيد طبعا هذا مبين من خلال استثماراته خارج الديرة سواء في لبنان أو في مصر وبناءه بمصر مدينه كاملة بجانب البحر الأحمر شركة الخرافي متكفلة من الألف إلى الياء بكل شي فيها وانا سمعت انه عقد النية على بيعها بعد الظاهر بيسوي نفس حركة زين هذا اذا ما باعها ما علينا فيقول انه البنوك بتستفيد وطبعا الأقتصاد بيشلع وهذا الحجي ماخوذ خيره اضف لذلك أنه شركة الوطنية للأتصالات صارت مملوكة لقطريين سواء كلها او النسبة الاكبر منها وفيفا شركة سعودية والآن زين تصبح هندية يعني وين الشركات الكويتية وين الكويتي أنفع يعني نخلي زوير وعوير اهما اللي ماسكين اقتصاد هالبلد ولا تنسون سالفة شركة الوطنية للاتصالات مع جريدة الوطن خاصة انه جريدة الوطن لما شنت هجمة على رئيس وزراء قطر ومقاطعة شركة الوطنية للاعلان سواء في جريدة الوطن او قناتها ونشوفها تعرض في الراي يعني السالفة دخلت فيها سياسة وتسييس مصالح على حساب شنو عاد على حسابنا احنا يا المواطنين ..

يعني لو كنا قبل نفخر بشركة زين انها كويتية وعالمية الحين نقول شركة زين الهندية بس الصراحة ما نستغرب هالشي دام انه الكويت ديره طاردة للاستثمار خاصة شركة زين قبل فتره خلت البحرين مقر للشركة الأم لها يعني هذا المركز المالي والتجاري اللي نبيه وهذي مدينة الحرير وهذا مترو الكويت كما اطل علينا الوزير البصيري يقول بينفذ خلال 3 سنين انا اقوله صل على النبي وحاول تكون واقعي اكثرإاذا دبي خذت لها اكثر من 3 سنين تبي الكويت تنفذها بثلاثة والله حجي فاضي ..

بالنهاية كلنا انعرف ان بالكويت دايما يصير عندنا فوق العشر أو عشرين سنة تساؤل، طرح، تداول، شرح .. و بالأخير نقول الكويت بتصير صرح !!

Kefy_Q8y

السيناريو يتكرر !!

الصراحة مو معقول اللي قاعدين نشوفه هالأيام كثرة الاستجوابات واستهداف رئيس مجلس الوزراء يعني انا أشوف كل من يحاول يخطف الأضواء من الثاني والسبب تقوية وترسية القاعدة الأنتخابية على حساب مصلحة الكويت ..

في مجلس 2008 تقدم النائب فيصل المسلم في صحيفة الاستجواب تلاها حدس ومن ثم محمد هايف في عشر أيام !!

يعني أكثر من هالتخبط واللاعقلانية في الطرح ما شفت كل من يحاول يتسابق ويقدم استجوابه حتى المحاور كانت ضعيفة ..
خلونا بالبداية ناخذ أستجواب النائب فيصل المسلم :-

استجواب من محور واحد وهو يتناول مصروفات ديوان سمو رئيس مجلس الوزراء وكان من 21 صفحة قُدم في تاريخ 1 مارس 2009

وها هو اليوم يتكرر نفس السيناريو ويتداول النائب فيصل المسلم موضوع الشيكات ومصروفات ديوان سمو رئيس مجلس الوزراء ويهدد بالأستجواب او بالاستقالة.


الحين ناخذ الأستجواب الثاني الا وهو استجواب حدس :-

وكان في تاريخ 2 مارس 2009 شوفوا الفرق يوم واحد بس لخطف الأضواء والترزز أمام كاميرات الصحافة واعطاء التصاريح اللي ما منها فود المهم كان الأستجواب مقدم من قبل النواب الأفاضل جمعان الحربش ناصر الصانع وعبدالعزيز الشايجي وتضمنت خمس محاور وكان من ضمن محاور الاستجواب ايضا مصروفات ديوان رئيس مجلس الوزراء يعني الأخ فيصل المسلم لو قدم الاستجواب وتداول الموضوع والاخوان حدس ايضا تكلموا في استجوابهم راح نشوف تكرار ويمكن ماشين على المثل (التكرار يعلم الشطار) يعني ما غير مضيعة وقت وتعطيل للمشاريع التنموية اللي مثل بيض الصعو.

والحين نشوف تهديد العم أحمد السعدون في استجواب رئيس مجلس الوزراء واعطاء مهلة وذلك على خلفية الأعلانات الانتخابية ووزير الداخلية وهذا أيضا احتمال لأستجواب ثاني يقدم خلال هالمجلس لرئيس مجلس الوزراء وهلم جرا.

الحين ناخذ الأستجواب الثالث للنائب الفاضل محمد هايف :-

تقدم الأستجواب في تاريخ 9 مارس 2009 وطبعا على خلفية مسجد أبو فطيرة والفنيطيس اللي أزالتهم لجنة التعديات وهذا اللي قالوا عنه استجواب بو مسج طبعا اهني اختلفوا العلماء في ازالة المسجد او بقاءه وطالب النائب باقالة محمد البدر رئيس فريق الإزالات ولكن رئيس مجلس الوزراء جدد الثقة فيه وهنا تقدم الاستجواب.


ومثل ما نشوف الحين النائب الفاضل محمد هايف مهدد في وسائل الأعلام باستجواب رئيس مجلس الوزراء بخصوص مادة الموسيقى في المدارس انه ما تصير اجبارية وانه كما عهدناها اختيارية (انا عن نفسي ماخذ اربع مواد موسيقى ايام الثانويه) طبعا نشوف تصريح وزارة التربية انه المادة اختيارية وليست اجبارية لكن ما زال النائب الفاضل محمد هايف يحذر على انها لا تكون اجبارية ويهدد بالاستجواب ومثل ما صار في سالفة المسجد شكلها بتكرر هالسنة والسيناريو راح ينعاد ومثل ما شفنا بالبداية تهديد العم أحمد السعدون بالاستجواب ومن ثم فيصل المسلم والآن محمد هايف وكان كله ورا بعض يعني في اكثر من قناة دستورية الواحد يقدر يتبعها لكن النواب يفضلون الحل من الآخر ولخطف الأضواء وكسب ناخبين.


تصريح رئيس مجلس الوزراء انه لديه الرغبة في صعود منصة الأستجواب وتفنيد الأستجوابات هذا دليل ثقة انه اغلبية المجلس بصالح الحكومة وهذا شي ما يبشر بخير لأنه ما نبي نواب (بصامين) نبي نواب يحلل الاستجواب ويدرسه ويقول رايه فيه مو لمصلحة انتخابية او تمرير معاملات ينحاز لطرف على حساب الكويت.


لو بنقول تريثوا ماكو فايدة ولو بنقول خلوا الاستجوابات اخر الحلول هم ماكو فايدة لأنه وصلنا لمرحلة غابت فيها لغة الحوار وبقت لغة الحصار.

Kefy_Q8y

تصريحـــات أي حــاقه !!

المتابع لقضية المسلم مع شيكات رئيس مجلس الوزراء قد يرى العجب العجاب في تصريحات من نواب و مسؤولين في ديوان رئيس المجلس و محاميين و وزراء و سياسيين و موظفين و مراجعين و سكرتاريا و حتى عمّال تنظيفكو ..!


الغريب في الأمر أن جميع من تابع الموضوع سواء شخص ذو منصب أو شخص "بطّالي" يكتب في مدونه من خلف شاشة الكمبيوتر قد أعطى تصريحا برأيه أو على الأقل علّق على الموضوع، إلا صاحب الموضوع نفسه ..!


النائب محمد هايف يصّرح بأنه يساند المسلم في قضيته و بنت المبارك تصرح بان الشيك شخصي و فيه خرق للقانون و الراشد يأجل رأيه الى ما بعد الإستجواب و المحامي عماد السيف يقول بأن الحساب الشخصي لسمو الرئيس لا علاقة له بالمال العام و الملا يصرح بأن الاستجواب غير دستوري و الزلزلة يؤكد بأن يد سمو رئيس مجلس الوزراء بيضاء و نظيفة .. و سموّه يصرح بأن ليس لديه تصريح ..!




من التصريحات "المضحكه" التي قرأتها ..

تصريح الركيبي وكيل الشؤون المحلية في ديوان سمو رئيس مجلس الوزراء الذي فى فيه نفيا قاطعا أن تكون هناك شيكات صدرت من رئيس مجلس الوزراء سمو الشيخ ناصر المحمد أو أحد وكلاء ديوان سموه أو من الحساب الخاص بديوان رئيس مجلس الوزراء لمصلحة بعض أعضاء مجلس الامة ..


و الذي أتى من بعده تصريح عماد السيف محامي رئيس الحكومه والذي قال بأن الشيك من حساب رئيس المجلس الخاص ولا يمكن للنائب محاسبة رئيس المجلس في تصرفه في حسابه الخاص ..


هل الشيك صحيح و الا غير صحيح ..؟ لماذا الركيبي ينفي نفيا قاطعاً و يأتي بعده المحامي ليؤكد ان الشيك من حسابه الخاص ..! و هل عذر ان الجيك من حسابه الخاص يمكن ان ينفي تهمة الرشوه ..!




التصريح "الفهلوي" لوكيل المرجعيات الشيعيه في الكويت محمد المهري "على المسلم الاعتذار للمحمد أو فليستقل"

مع احترامي لشخصك لكن بأي حق تصرح تصريحات سياسيه و تتدخل في الشؤون السياسيه للدوله ..؟ من أنت لكي تتكلم بالسياسه و تطالب بالإستقاله ..؟


هل أنت وكيل المرجعيات الشيعيه في الكويت أم وكيل المرجعيات السياسيه أو البرلمانيه أو الانتخابيه أو الوزيريه أو الحكومية أو الناصريه أو Whatever !


مشكلة تدخل رجال الدين بالأمور السياسيه في الكويت لن تنتهي ..




أخيرا تصريح "سري" وصلني من أحد المصادر البرلمانية "السريه" أيضا يفيد بالتالي ..


"الشيك عباره عن فك رقبه للمواطن السعودي سعد مبارك المطيري ونقل الشيك النائب السابق حسين القويعان المطيري وبأسمه حتى لايخرج الشيك بأسم رئيس الوزراء الكويتي واتهامه بالتدخل بالشؤون الداخليه السعوديه"


أتمنى ان يكون الكلام صحيح، لكن استعبد كونه صحيح، هل الكويت خلت من المواطنين حتى يكتب الشيك بإسم النائب الفلاني لينقله الى السعوديه ..؟


لماذا لم ينقل الشيك من قِبل أحد المواطنين حتى لو كان أحد الموظفين بديوان سموه أو أحد أقربائه حتى لا يضع نفسه بالشبهات ..؟


و حتى لو كان الكلام على الشيك المذكور صحيح فما هو التبرير للشيكات الـ6 الأخرى التي لم تكشف الى الآن ..!


و لأي درجة من "التغفل" التي تجعل رئيس مجلس وزراء لا يعي أن هذا الأمر يضعه تحت المسائله القانونيه ..؟

"مصيبه" اذا لم يكن يعرف !






بإنتظار مزيداً من التصريحات ..



Anfal

شيكـــات المسلم

بالرغم من عدم اتفاقي مع منهج العضو الدكتور فيصل المسلم ..

إلا انني أعجبت بجرأته و قدرته على قول ما لا يستطيع الآخرين التفوه به ..

بدأت قصة الشيكات من فتره ليست قريبه ..

و كان الدكتور يلّوح بالموضوع من بعييد و ينتظر الفرصه الحاسمه لكي "يفجر" الساحه بما لديه ..

دخل في الموضوع عندما قال أن لديه شيكات تدين رئيس مجلس الوزراء و بعض أعضاء المجلس ..

ضجت الساحه بتصريحاته و اعتقد انه أراده التهدئه فقام بتغيير جزء من كلامه فيما بعد و قال أنه لا يتهم أحد و لكنه يستفسر عن الموضوع، و غيّر الموضوع من استجواب الى سؤال برلماني ..

حقيقةً هذا أول مأخذ على الدكتور في موضوع الشيكات و يمكن القول ان عندها "طاح من عيني" خصوصا بعد تصريحاته الواضحه بحصوله على صور شيكات تدين ناصر المحمد و بعض الأعضاء و تغيير تصريحاته بعدها فوراً بأن ما لديه مجرد معلومات يريد التأكد منها و كان يتكلم بكل ثقه بأن ما نُشر في الصحف ليس مما قال، و لكن في الحقيقه كلنا نعرفه انَّهُ قوله جملتاً و تفصيلاً ..!

سكت فيصل و سكت الجميع معه و لا أعرف سر هذه "السكته" الطويله حتى أتى بتفجيره الأخير في الجلسه التي عرض فيها المسلم الشيك الذي صدر من ديوان مجلس الوزراء بقيمة 200ألف لحساب أحد الأعضاء .. و الذي اعلن الديوان ان الشيك من المصروفات الشخصيه لناصر المحمد و ليس من أموال الشعب و اللي اعتبرها شخصيا (ما طاح الا انبطح) فالرشوى هي رشوى سواءاً كانت من أموال الشعب أم من أمواله الشخصيه ..!

على أية حال أعتقد ان فيصل المسلم فيما فعله قد وقع في بئر لا يمكن الخروج منه ..

من واجبات كل نائب الحفاظ على أموال الشعب و كشف الفاسدين من "حرامية" أموال الدوله و الفاسدين من الأعضاء عابدين الدينار، لكن ..

الوسيله التي وصل فيها النائب لما يريد ليست سليمه و هو بهذا قد "ورّط" معه كل من يمكن توريطه بهذه العمليه ..

كان يجب على النائب الفاضل حساب الربح و الخساره من العمليه قبل القيام بها ..

الربح أننا عرفنا ان هناك بعض النواب "المرتشين" بالمجلس و عرفنا ان رئيس مجلس الوزراء هو "الراشي" ..

اذا اردنا التكلم عن الربح .. لنكن واقعيين ..

من منّا لا يعرف ان هناك أعضاء فاسدين بالمجلس و "يموتون على ريحة الفلس" ..؟

الكويت صغيره مثل ما يقولون و كلنا انعرف ان الفساد نخر بالمؤسسات الرئيسية بالدوله ولم يتبقى منها سوى كراسي و بشوت "طويلين العمر" و حسابات شخصية بالملايين ..

لكن الشيء الجديد الذي طرحه فيصل المسلم "دليل ملموس" يدين أسماء بعينها يُشكر عليه ..

اذا انتقلنا الى الخساره التي سيجنيها النائب ..


اعتقد ان الحرب القائمه عليه الآن هي بعينها ما سيجنيها النائب ..

لن يقوم أحد بمحاسبة الراشي ولا المرتشي و هذا ما عهدناه في ديرتنا الحبيبه ..

لن يتغير رئيس المجلس حتى لو حاربنا لأجل تغييره ..!

النائب وقع في دائرة القضاء و المحاكم و لا اعتقد انه سيخرج منها "سليم" ..

من ساعده بهذه العمليه "راح تنخرب بيوتهم" ..

بنك برقان تشوهت سمعته و بالتأكيد "سيرد الصاع صاعين" ولا ألومه على هذا ..!

الشعب الآن يطالب بأسماء النواب و اذا لم يكشفها المسلم فهو متستر عليهم و اذا كشفها فالوضع في البلاد سيزيد سوءاً ..

معركه صعبه ولا نعرف من هو الخاسر فيها ..

اعتقد ان الوقت قد حان لإنتفاض الشعب و وقوفه بوجه الفساد ..

لكن ..

لنتريث ..

فـ مازال للموضوع تتمه ..

"و ياويلك من الياي" ..!

كان الله بعون هذا البلد المسكين ..

Anfal

لقاح فلونزا الخنازير

الفيديو: امرأه في الـ25 من عمرها بكامل صحتها تم اعطائها لقاح انفلونزا الخنازير و انتكست حياتها بعد 10 أيام من أخذه ..

اللي يشوف الفيديو ما يقدر ان يقول غير الله يكافيننا الشر و الله لا يبليننا انشالله ..

لقاح انفلونزا الخنازير ..

سمعنا و سمعتم أكيد كثيرا عن أضرار لقاح انفلونزا الخنازير ..

يقولون المرض انتاج متعمد من شركات الأدويه و يقولون بعد ان امريكا فعلت هالشي عمداً لأنها تبي تقلل عدد سكان الأرض ..!

الصراحه ما ندري شنو نصدق و الا منو نصدق ..

قالو اللقاح له اضرار كبيره و ممكن ان يؤدي الى نتائج وخيمه و وزارة الصحه عندنا تؤكد ان اللقاح سليم و وزير الصحه أول شخص تم تلقيحه ..

اللي انعرفه و اللي متأكدين منه ان اللقاح يستعمل للمره الأولى وما قط طعموا فيه أحد من قبل ..

بغض النظر عن صحّت الكلام عن حرب شركات الأدويه و تصنيعهم المتعمد للمرض و بغض النظر عن صحّة الأعراض الخطيره للقاح ..

و بغض النظر عن عن اللقاح يستخدم للمره الأولى و ان ممكن تكون له اعراض جانبيه على المدى البعيد يعني ممكن تظهر الأعراض بعد 5 أو 10 سنوات و الله وحده اللي يعلم شنو ممكن تكون ..

و بعض النظر عن ان ممكن هالحاله النادره اللي صابت البنت اللي بالفيديو ممكن انها تصيب أي واحد ثاني يتلقح ..

ليش انحط صحّتنا في دائرة الشك ..؟

جم واحد فيننا عرف ناس حاشهم المرض و تشافوا منه و زي الفل ..؟

الواحد يحصن نفسه من المرض و يتفادى التعرض له قدر الإمكان و يخلي الباجي على ربه ..

لو صار في شخص بعيد الشر عن الجميع اتوقع العلاج يكفيه و يعطينه مناعه فـ ليش استخدم اللقاح دام ان العلاج بيعطيني مناعه أصلا ..؟

صراحه زمن أغبر اللي حتى الصحه قمنا انتاجر فيها و نهايط عليها ..

ما اقول الا الله يكافييننا الشر ..

و فكرو ألف مره قبل أخذ اللقاح ترى أبدى ما على الانسان صحته و الله يحيمنا و يحمي بلادنا من شر هالأمراض ..

الزمن هذا كثر فيه الهرج و المرج و الواحد صار ما يعرف الصح من الغلط و اختلط الحابل بالنابل ..

بس هم التوعية مطلوبه و يقولك روح بعييد ورد سالم و الله يشافي كل مريض و يهنّي كل واحد بصحته و يبعد عنه المرض ..

Anfal

لنتخيل أن حلم "هايف" أصبح حقيقه !

هايف ..

حجاب النائبات ..

أسيل ..

رولا ..

اللبس الشرعي ..

ما تقولولي هايف اشعنده مناشب هالنائبات على نتفة كشه على راسهم ..؟

يعني الحين يا هايف لييي هالدرجه كشيشهم هامينك و مسوينلك أزمه ..!

و خلصت مشاكل الديره علشان نتكلم عن هالموضوع يعني؟

انزين مو مشكله .. اقتنعنا ان حجابهم فعلا مسبب ازمه لبعض النواب ..

خلنا ناخذها حبه حبه ..

و نتخيل ان حلم هايف اصبح حقيقه ..!

حكمت المحكمه الدستوريه بـ تطبيق نص الستور ألا و هو
"الزام الناخبه و المرشحه باللباس الشرعي" و طبعا اللباس الشرعي حسب تعريف الاخوان يعني "حجاب"

يتنا رولا تتزنقح داشه المجلس و من خلفها أسيل ..

انشوف رولا من بعييد وهي مكتسيه بالحجاب الوردي ..

ليش وردي عاد مادري بس آنا تخيلتها جذي عاد انتوا تخيلوها مثل ما تبون ..

انشوف من خلفها أسوول مع حجابها البيجي ..

دشو المجلس .. اقعدوا .. انطالع عدل .. شنو هذا ..؟

رولا لابسه جينز و بدي مطلع كل الحاقات لكن هاااااااااااا ..
الحجاب على راسها يا جماعه لا تفهمونها غلط ..

حطو بعد مع الجينز حزام و تحت كعب تطقطق فيه و تتعلج ..

و المكياج يقولك طالعني ..

أسول ..

ما نبي نتكلم عنها بس تخيلوا انها مسويه شي على غرار رفيجتها ام حجاب وردي ..

قولولي .. احنا بهالحاله شنو اللي استفدنا ..؟

الديره شنو اللي استفادته ..! الدين شنو خذا من هالتطبيق ..!

لنفرض .. ان هالشي فعلا حدث ..

ساعتها هايف شنو اللي استفاده و وين تطبيق الدين اللي يبيه ..؟

هل اذا بنطبق نص الدستور راح يتطبق ايضا على الناخبات ..؟

اذا هاذي مطالبات هايف آنا بعد اطالب يحطون خيشة حجابات عند مقار التصويت
علشان كل وحده بتدش تسحبلها حجاب و "تلووته" على راسها خلال التصويت ..!

الفكره اللي ابي اوصلها ..

مع احترامي للنائب هايف لكن مطالباته جدا "سخيفه"
و الشي اللي يبي يوصلّه مافيه مصلحه لا للدين ولا للديرة ولا للشعب ..

لأن الدين عمره ما يتطبق بالإجبار و لو تطبق في 100 وسيله
يقدر الشخص المجبر ان يستخدمها حتى يتحرر من الإجبار ..

الحجاب واجب هذا شيء لا نختلف عليه لكن إجبار النائبات على ارتداءه داخل البرلمان
و خلعه عند باب البرلمان لن يعطي للدين أي إفاده ..

على العكس مطالبات هايف ممكن انها تشوه صورة الدين و تحول الواجبات الدينية الى واجبات سياسيه
و يصير الحجاب بالنسبه لـ هالنائبات تحدي سياسي وليس تطبيق شريعه اسلاميه ..

تقدر هالنائبات نفس ما ذكرت بالتخيل انهم يلبسون الحجاب على راسهم

لكن لبسهم يكون لبس فاضح -مع احترامي لهم-

و ممكن انهم يلفتون النظر أكثر من الحين فـ الحجاب ليس مقياس للحشمه او "اللبس الشرعي"

و لا تقولولي بعد ان هايف عقب هالشي راح يطالبهم بلبس العباة ..!

اللي يبيه يصيير الأخ هايف مثل بعض الناس الله يهديهم اللي يجبرون بناتهم على لبس النقاب
و تلبسه من غير مشتهى فـ تلاقيها ترسم عيونها رسم تلفت فيه اكثر من لو كانت من غير نقاب و طبعا مابي اتكلم عن العطر اللي اتشمه عن بعد الف متر و المشيه و العباة المخصره .. !

بهالطريقه اهيا قاعده تشوه صورة الدين و قاعده تسيء حق حجابها أو نقابها و بالتالي تسيء للدين ..

طبقوا هالموضوع على موضوع هايف و راح توصلون للفكره ..

ملاحظه: تخيلاتي أبعد ما تكون عن الحقيقه و لا اقصد فيها أي سوء لأحد


Anfal

من تصويري Anfal :)

وطني لو شغلت بالخلد عنه .. نازعتني إليه في الخلد نفسي

(أحمد شوقي)


Anfal