الجمعة، 13 نوفمبر 2009

والله عيب


(أقام تجمع صوت الكويت احتفالية بمناسبة مرور 47 عاما على وضع الدستور الكويتي باعتباره وثيقة أسست مبادئ العلاقة بين المواطنين وحددت حقوقهم وواجباتهم وفق مفاهيم العدل والمساواة) لي اهني الخبر زين ومن أحلى ما يكون من حقهم هالتجمع الطيب يحتفلون ويستانسون بس العيب أنه لما نسمع من نواب سابقين من أمثال النائب عبدالله النيباري أنه يرمي الدستور احتجاجا على عدم الألتزام بمواد الدستور فهذي مو حلوة لا بحقك ولا بحق الدستور اللي أنت بيوم اقسمت على حمايته وحماية مواده ويوم ما صرت خارج التشكيلة النيابية قمت ترمي الدستور وهذي مو حلوة بحقك شخصيا ومو حلوة لتاريخك النيابي ..

أغلب المشاركين في تجمع صوت الكويت كانو من المنبر الديموقراطي سواء أسيل العوضي رولا دشتي وعبدالله النيباري ومجموعه من الشباب واليهال اللي قاموا يقطون الدستور مستانسين على السالفة .. هالدستور اللي عن طريقه قدرتوا تنضمون هالاحتفالية وهالدستور كفل لكم حرية الرأي اللي تتمتعون فيها لكن للأسف انه مو كفو ديموقراطية لانكم تهينون نفسكم قبل لا تهينون الدستور ..

أنا إذا اختلف معاك فهذا شي طبيعي لكن لما تشوف الدستور ما يخدم مصالحك تقوم وترميه فهذا نسميه قلة أدب فالعتب قبل لا يكون على يهال وشباب صوت الكويت يكون العتب على النواب اللي مشاركين رغبة بهالجم صوت من اللي مخهم ينفر بكلمتين وشويه ترزز ولقطات جدام الكاميرا .. أخيرا وليس أخراً النائب عبدالله النيباري أنا أقول ما بقى بالعمر كثر ما مضى وأنت حاولت بشتى الطرق تنجح لكن للأسف ربعك ما يبونك وتخبطكم شتتكم فأقول استريح وريّح
تنويه: بآخر كل موضوع يكون اسم كاتب المقالة فأرجو من الأخوان اللي بيردون
ينتبهون على هالشغله لأني لاحظت بالمقالتين اللي قبل كانوا رادين على الأخت انفال
والموضوع كان تابع لي ويعطيكم ألف عافية.
Kefy_Q8y

هناك 6 تعليقات:

  1. الصراحه شي غريب ..!

    تناقض بين كلامهم و فعلهم ..!

    احترم جميع الموجودين و كلامهم لا غبار عليه لكن طريقة الاحتجاج اقل ما يقال عنها "سخيفه"

    سؤال ..

    منو الذكي اللي اقترح هالطريقه الذكيه في الاحتجاج ..؟

    والله آنا مستغربه ناس عقل و ثقل من امثال دكتوره اسيل ممكن ان اتسوي هالشي و ما تعترض بأن الفعل خطأ ..!

    المشكله ان كلامهم يقول "التجمع يمثل احتفالا بالدستور الذي احدث نقلة نوعية في تاريخ الكويت"

    أول مره بحياتي أعرف ان الاحتفال بشي يكون برمية بالقمامه ..!

    الله يهديهم و يردهم حق عقلهم ..

    و مبروك الذكرى الـ47 لوضع الدستور :)

    أنفال

    ردحذف
  2. وانتي بس طايره على اسيل يا معوده من اولهم لي اخرهم ما يستحون احنا من قبل فتره طل علينا النائب وليد الطبطبائي ورفع الجوتي تعبير عن الاحتجاج واليوم نشوف رمي الدستور والمشكله لي احد داس لهم على طرف راح يحتمون بالدستور اللي قطوه

    Kefy_Q8y

    ردحذف
  3. والله عيب عليك انت الي تسويه من هجوم لا اخلاقي
    ذكرت الفكرة من رحلة الدستور الي جزء منها كان رمي الدستور قبل الغزو بعدين استعادته بعد الغزو؟
    انتو عليكم امانة في نقل الخبر ومسئولية كبيرة ارجوا تكونوا على قدرها
    اتمنى ان تملك الشجاعة الكافية لتمسح الخبر وتعتذر عن تجنيك بهذه التغطية وبقولك ان صوت الكويت يتبع المنبر والتحالف

    ردحذف
  4. أول شي اخوي الكريم أنا كنت اتمنى انك انت بالبداية تتحلى بالشجاعة وتكتب على الأقل اسم لك عشان نعرف نخاطبك فيه لكن ما عليه براحتك

    ثاني شغلة أخوي اتمنى أنه يكون كلامك اوضح من جذي يعني ما في ترابط ولا فكره واضحه خاصة في ثاني سطر

    ثالث شغلة ولله الحمد اني ما اذكر أخبار مغلوطة كل اللي اذكره منشور في جريدة الراي وإذا حاب ازودك باللنك أنا حاضر

    رابع شغلة أنت لو تلاحظ فوق في مقالتي أنا ذكرت النواب يتبعون المنبر الديموقراطي ما ذكرت يهال وشباب صوت الكويت اهما اللي يتبعونه مع أنه أنا قعدت مع ناس من تجمع صوت الكويت كان فكرهم واضح ليبرالي بحت وكانوا وقت الانتخابات مفاتيح انتخابية ومعاونين لنواب من المنبر الديموقراطي واللي يشتغل لنائب معناتها انه يؤمن بافكاره السياسية واطروحاته ولو تشوف كلامهم كله نسخ واضح من حديث النواب من امثال اسيل العوضي رولا دشتي صالح الملا وغيرهم يعني باختصار مثل الببغاء اللي بس يكرر ومو فاهم انا هذا ما ذكرته في مقالتي بس انت حديتني اقوله.

    اكرر شكري لك لمرورك ولكن اتمنى منك بالمره المقبلة لو بتعلق على الموضوع تقراه عدل بالأول وبعدين تحط لك اسم أو nickname عشان احاورك

    شاكر لك

    Kefy_Q8y

    ردحذف
  5. مادري حضرتك تبي توحي بأني متخفي ورى كلامي لانك تملك حقيقة فقعت عين الشمس
    انا محمد البوص من التجمع خنشوف شجاعتك انت بكشف اسمك مع اني ادري انك ماتقدر تكشفه لانك تبي تهمش اعمال غيرك وهذا خلل نفسي الله يعينك عليه
    واعتقد انه من الاحرى فيك تكون مهذب اكثر في الحوار لان مدونتك محد يقراها وانا دشيت وعلقت اهني عشان اذكرك بالامانة الملقاة على عاتقك لما تنشر خبر
    قبل لا تهاجم المجموعه علشان صحفي مغرض كتب خبر على شاكلة "رجل عض كلب" عليك بالاول تدش تقرا اهداف المجموعه المؤمنه بالدستور والاحرى فيك ايضا تقرى تغطية باقي الصحف للخبر مو بس الراي علشان ماتكون محدود المعرفة مثل ما هو باين وبعدين مسمى الحدث في ساحة الارادة كان احتفالية مو احتجاج مثل ما كتبت الراي شلون يتسق هالمسمى ورمى الدستور بالقمامه رغم ان الصورة تبين ان المكان الي انحط فيه الدستور كان سطل يستخدم في اعمال البناء والفكرة كانت تعبير رمزي عن الاستغناء عن الدستور ومن ثم يرجع الي حطه ياخذه حسب تسلسل زمني معين
    انا تحديتك لو كنت تملك الشجاعه جان تحريت عن الموضوع وعرفت انه تغطيتك غلط ومتحامله ومسحت البوست بس للأسف شخصنت الموضوع وتهمتنا بأننا مفاتيح انتخابية وبأننا ليبراليين وانت علبالك يعني مسكت السبع من ذيله وكشفتنا مشالله عليك

    ما راح ارد على باقي مهاتراتك لانك لست خصم نزيه وهنيئا لك عداواتك مع السراب
    وشكرا

    ردحذف
  6. والله التهذيب بالحوار مبين من ردك للأمانه ومصطلحاتك اللي اذا بتدل فتدل على بيئتك الحميدةالمهم انا اظن ذاكر بالبلوق انه اللي يبي يخاطبنا ويعلق على كلامنا ما نبي يكتب غير معرف يكتب له على الاقل nickname عشان نعرف نرد عليه وانا ما اجبرتك تقولي اسمك لانه مايهمني ولا بيغير من رايي شي فاتمنى تشوف عدل البلوق وتعرف قوانينه دامك تطالبني اتحلى بالامانة على قولتك ..

    الحين خلنا نرد على مغالطاتك وزيفك اللي دايما تتحلون فيه وسهل عندكم الكلام فلما تقولي انه قبل ما اهاجم المجموعه اتأكد من صحته فانا اقولك الخبر منشور في جريدة الراي وبالصور وانا حاط صورة عشان اللي مو متاكد يتاكد يشوف شنو قاعد يصير من تدليس وانا سمعت الحجي اللي قالوه الاخوان في التجمع وكان نفس الكلام اللي قالوه النواب المشاركين في الاحتفالية على قولتك ومابي اذكرك في مقابلة قناة الشاهد اللي طلع فيها تجمعكم بصورة مخزية واهما يرددون كلام النواب الفارغ بعد ما عقد التحالف الليبرالي ندوة الحجاب والكلام سبحان الله نفسه اللي بالندوه انقال من النواب محمد الصقر صالح الملا اسيل العوضي رولا دشتي كان نفس الحجي اللي قاله تجمعكم شنو اكثر من هالجذب تطلعون وتقولون مبادئ واحكام مستقله عن التفكير الليبرالي وانتوا ترددون كلامهم
    وانت اخ محمد ما تفرق بين القمامة والسطل بالله عليك تقص على منو يعني الصوره مالت النيباري لما يقط الدستور هذا ما تسميه احتجاج ؟؟
    دام انها احتفاليه ليش قطيتوه بالسطل؟
    في اكثر من طريقه وطريقه للاحتجاج بس الظاهر السطل عاجبكم لانه يضم مبادئكم الواهية وانا قعدت مع الاخ الملا من تجمعكم وعرفت افكاره وانه كان يشتغل لاسيل العوضي وقت الانتخابات فلا تنكر وتقول ما اشتغلتوا الا اشتغلتوا واذا انت صج من التجمع روح سأله وخله يقولك فلا تقعد تعمي عيون الناس على كلام فارغ وابلغ حجه على كلامكم شوفوا منو تكلم باحتفاليتكم مو كان الاحرى فيكم انه تنادون نواب من التكتلات والتجمعات الثانية وتنادون شخصيات سياسية من تكتلات كثيره غير الليبرالين شمعنه اهماالوحيدين اللي وافقوا الظاهر انه انت تطالع لي طرف اصابعك وصرت نفس الببغاء اللي يسمع الحجي ويقوله بدون تفكير ولو بترد ابسط شي بتقوله دعيناهم بس ما استجابوا اللي يجذب مره مو عيزان يجذب مرات
    اخوي ما يهمني رديت ولا ما رديت لانه حججكم والله ضعيفة لكن بالاخير ابلغ رد عليك هو:

    ودع الكَذوبَ فلا يكن لكَ صاحباً إن الكذوبَ يشينُ حُرّاً يَصْحَبُ

    واحفظ لسانكَ واحترِزْ من لفظهِ فالمرء يسلمُ باللِّسان وَيَعـطَـبُ

    Kefy_Q8y

    ردحذف