الجمعة، 11 ديسمبر 2009

حسبي الله عليك يا بو رمية جانك بتقلب الديره عليننا

آنا ماني عارفه اللي ينقال له بو رميه هذا شنو هدفه بالدنيا ..؟
طلعلنا بسالفة القروض و شط عمره علشان يطيحون قروضه و المساكين اللي عليهم الف و الفين ما يدرون ان قروضهم ما تساوي شي عند قروض الأخ العزيز اللي قاعد يطالب باسقاطها و ما يدرون ان كل هالحماس علشان مصلحته ..
خلينا سالفة القروض طلعلنا بسالفة البدون ..
أول شي آنا مو ضد حقوق البدون و بالعكس آنا مع اعطائهم حقوقهم لأنهم بالنهايه بشر حالهم حال أي هندي و الا مصري له حقوق و سفارة يلجأ لها متى ما احتاجها ..
مشكله البدون متشعبه و عويصه على قولتهم و اعتقد ان كل حل أمر من الثاني لأن البدون اللي فعلا يستحقون التجنيس قليلين مثل ما كلنا انعرف و الباجي كلهم لفوو عليننا من هالدول القريبه ..
شلون انفرق بين الأثنين ماني عارفه الصراحه و شلون نقدر ان نعطي المستحقين و نفصلهم عن الحوش الباجي هم ماني عارفه ..
و شنسوي في عوير و زوير اللي قطو جناسيهم و يوننا مادري .. انقطهم في البحر و الا انحطهم في صاروخ و اندزهم القمر ..؟
المهم مو هاذي سالفتنا ..
سالفتنا بو رميه اللي مسويه نفسه المدافع عن الحق و تصريحاته بحشد 100 الف بدون في ساحة الاراده للضغط على الحكومه ..!
ما ادري هالبو رميه هذا شنو ناوي عليه اللي بيمّع 100 الف بدون عند المجلس ..
الصراحه زين ما سوو الداخليه لأن من المعروف ان عدد مو قليل من فئة البدون "خريجين سجون" و هالشي ما عرفته باحصائيه لكن الجرايم اللي انشوفها يوميا من سرقات و غيرها البدون يلعبون فيها دور كبير و طبعا آنا اتكلم عن البدون الحوش مو اللي يستحقون و انظلموا ..
فـ شنو نتوقع من 100 الف شخص من هالفئه في مكان واحد و شنو ممكن يصيير ..؟
الداخليه عندها معلومات بأن ممكن تصيير تفجيرات و هالشي مو غريب اذا فعلا صار هناك حشد لأن في ناس مو خسرانه شي و اذا كانت اصلا عليه قضايا و بلاوي ف حياته اصلا مو هامته سهل عليه ان يقوم في مثل هالاعمال ..
و حتى لو ما صار تفجيرات احتمال كبير تصير مشاجرات و مشاكل و هذا شي مو مستبعد كلش ..
فـ الله يحط كيدهم في نحرهم و الله لا يوفقك يا بو رميه اذا ناوي تزعزع الأمن عندنا ..
و الله يحفظ الكويت انشالله ..
Anfal

هناك 5 تعليقات:

  1. ما اعتقد ان بورمية كان يقصد هالشي فعليا, مجرد كلام وصراخ وهياط كالعادة

    بس بكل الاحوال وزارة الداخلية من حقها انها تحتاط لاي مشكلة مترقبة, امن البلد خط احمر

    بس اتهامج للبدون انهم اصحاب مشاكل او مجرمين, هذا اتهام شمولي وخاطئ

    لنفترض مثلا تن فيه عشرة او عشرين مجرم كويتي, هل يعني هذا ان الكويتيين كلهم مجرمين؟

    لاتظلمين أحد ولا تحطين بذمتج, أقسى شي على البني آدم ظلم الناس له

    مشكلة البدون من الممكن حلها وبسهولة عن طريق اعطائهم حق الإقامة والعمل والتعليم والرعاية الصحية بالكويت, تماما مثل الوافدين, لا اكثر ولا اقل

    مع الوضع بالاعتبار اختيار البعض منهم بالمستقبل وفق معايير معينة وعادلة كحملة الشهادات والاكفاء للتقدم بطلب الحصول على الجنسية

    طبعا معايير من غير اي واسطات او تدخل من نواب الغفلة

    ردحذف
  2. حل مشكله البدون سهله . تسكير باب التجنيس نهائيا وللابد. شنو ضروره التجنيس ؟ ما عندنا مشكله قله عدد سكان ولا احنا قادرين نحل مشاكل الكويتيين . افضل شي اعلان الحكومه تسكير باب التجنيس ومشكله البدون بتنتهي لان غالبيه البدون راح يطلعون جناسيهم الاصليه .

    ردحذف
  3. أزال المؤلف هذا التعليق.

    ردحذف
  4. التصريح كان محرف حق بورميه والدليل ان محد نشره الا جريده وحده فقط وباقي الجرايد كان التعليق مختلف تماما ولا فيه طاري اميه الف وحشد

    واذا انا مو غلطان ثاني يوم نشر خبر ان تصريح بورميه محرف

    صحفنا مو مصداقيه بالمره وهي ساس البلا

    تحياتي

    ردحذف
  5. أنا أتفق وياك يا صاحب المدونة البدون أغلبهم لفو والا شلون طلعوا لنا فجأة بعد التحرير .....يعنى بسرعة البرق انولدوا....؟؟؟

    ردحذف