ضرب عبيد الوسمي

http://www.youtube.com/watch?v=2HebOc-dq40

لا حول ولا قوة إلا بالله !!

الصراحه شفت هالفيديو و كش شعر يمبي !!

فعلا مثل ما قالوا تذكرت مشاهد الغزو اللي كانت تنعرض بالتلفزيون !!

بأي حق تسحب هالشخص بهالطريقه و اتطقه !!

الشخص غلط و الغلط راكبه لكن لو مهما كان اهو غلط بالكلام ما شال سلاح علشان تسحبه بهالطريقه ..

الديره فيها قانون فيها محاكم فيها أمن دوله انت شكوووو اتطقه بهالطريقه !!

اتمنى من وزارة الداخليه انها تعترف بغلطها من هالناحيه والله عيب عليكم الفيديوات تارسه الدنيا و انتو اتجذبون اشكرا على الناس ..

آنا مع الداخليه في تطبيق القانون لكن التطبيق عمره ما كان بهالشكل ..

استغفرالله والله الواحد مايدري شيقول ..

الله يهدي الجميع و يحفظ هالديره ..

Anfal

مسرحية الحربش

كل ما أقرى و أشوف أكثر عن اللي صار بندوة الحربش كل ما أنقهر أكثر و أكثر على الديره و أحوالها ..

مسرحية و مهزله و اللي يقول غير هالحجي غلطان و ستين غلطان ..

تشويه للحقائق و اشاعات و حجي فاضي من صارت الاشتباكات مع القوات الخاصه و احنا نسمع عن القمع و الارهاب اللي مارسته القوات الخاصه "الكويتيه" على بعض النواب و الجمهور في الندوه ..

و هم بعد سمعنا عن التواجد "البريء" للنواب في الندوة و "عدم" مخالفتهم للقانون و دخول القوات الخاصه من غير سبب عليهم و ضربهم و اخراجهم !!

آنا من البدايه ما دش مخي هالكلام قلت الموضوع فيه حلقه ناقصه فيه شي غلط .. بعد ما اطلعت الفيديوات و الصور و انكشف المستور اتبين لي ان اللي صار مسرحية "متعمده" بس من منو ...؟

خلنا انشوف هالفيديووو اللي يتكلم فيه الحربش بقناة الجزيرة و نسمع تبريراته و وصفه للي صار ...

http://www.youtube.com/watch?v=JdrymWjsDKU

يقول الحربش: "قلت على الجميع المغادرة حتى لا يحدث صِدام بيننا و بين اخواننا العسكريين" و ركزو على كلمة أخواننا ..

و يقول بعد: "حينما سمعوا هذه الكلمة اُعطيت الأوامر بالهجوم مباشرة على الناس"

و أضاف: "و هذه العملية كانت مرتبه فيما نراه و كانوا قاصدين ايذاء الناس و اهانة الناس"

و لما اسأله المذيع "المعروف ان الحكومة تمنع أي تجمع خارج الديوانيه و تعتبر حدوث ذلك خرقا أصلا"
قال: "هذا الاجراء غير لائحي غير دستوري لأن حدثت ندوات كثيرة خارج الدواوين أساسا" .. "و مع ذلك لما حضرو الأمن و طلبوا فض الناس بفض الناس بالخارج و انتهاء الندوه"

اسأله المذيع: "هل يتم التعامل بنوع من الانتقائيه؟"
رد: "من الواضح جدا ان هناك انتقائية لأن قبل يومين كان في ندوة عند النائب أحمد السعدون .."

هذا اهم اللي قاله كتبته علشان يكون مرجع للردود اللي راح اطرحها آنفاً ..

حلو؟

الحين انشوف فيديو فيه مقطع من التشابك مع القوات الخاصه و بعدها راح ادخل بصلب الموضوع ..

http://www.youtube.com/watch?v=afRX7J4GX18

من اللي قاله الأخ في الفيديو هذا أثناء اقامة الندوة ..

" انا اقول انه لا كرامه من غير ثمن و انا على استعداد ان ادفع هذا الثمن"

"هذا انذار أول و أخير ان تصل المسألة الى حد انتهاك حرمات المنازل و الدخول في اجتماعاتهم الخاصه و الدخول في منازلهم و تحقير الدوله باستخدام وسائل الدوله فهذا امر موفوض لأي فردٍ كائنٍ من يكون و أياً كان موقعه في السلطة"

" و منع التجمع خارج المنزل هذا قرار منعدم لا قيمة له لذلك ارجوكم لا تدفعون الناس للصدام احترمونا نحترمكم أما ان تصل المسألة لحد امتهان الكرامه فالحقيقه انه لم يبلغ شيء لم تقم به هذه الحكومة"

نأتي الى الموضوع الاساسي ..

أولا أوامر صدرت إلى وزير الداخليه و الأوامر من أمير دولة الكويت الشيخ صباح الأحمد الجابر الصباح بمنع أي تجمع خارجي و حفظ الأمن في البلاد، الأوامر صدرت بعد ندوة السعدون اللي تم فيها ضرب الجويهل من قبل المئات و تركه بين الحياة و الموت و بعدها تبرّي السعدون من تحمل المسؤولية لأن على حد قوله ان اللي حدث "خارج" المنزل مع العلم ان كان مكان مخصص للندوة و الاعتداء تم فيها ..

الحين ما عليننا من اللي صار قبل لكن كلامي توضيح للسبب اللي دعى الأمير لطلب حفظ الأمن و منع التجمعات الخارجية ..

في تصريح الحربش لقناة الجزيرة تجاهل النائب أوامر الأمير بشكل كامل و تصريحاته كلها يتكلم و كأنه ما سمع عن الأوامر بمنع التجمعات الخارجية ..

و أكثر من هذا لما اسأله المذيع عن منع التجمعات قال ان هذا الأمر غير لائحي و غير دستوري و كأن أوامر الأمير "غير دستوريه" و لا يعترف فيها، و أكثر من هذا في ندوته قيل ان منع التجمع خارج المنزل قرار منعدم لا قيمة له و هم يعرفون انه قرار من الأمير ..

و لما اسألوه عن الانتقائيه في المنع قال ان هناك فعلا انتقائيه و ذكر ندوة النائب السعدون "قبل يومين" و نسى أو تناسى ان يذكر الحادثه اللي صارت بالندوه و نسى بعد ذكر ان الأمير بعد هذه الندوه أمر بمنع التجمعات و هذه كانت أول ندوة تقام بعد صدور الأوامر و تم تحذير الحربش قبل الندوه ان ما يتواجد أحد خارج المنزل و استجاب بأن شال الكراسي لكن التجمع ضل موجود خارج المنزل و هذا ما دعى وزارة الداخليه للتدخل ..

ثانيا من الواضح جدا التضارب في تصريح الحربش لقناة الجزيرة مع الكلام اللي قيل خلال الندوة و الحمدلله ان كل شي مسجل علشان ما تقدر انك اتقص عليننا بمسرحيتك ..

في تصريح الجزيرة قال قلت على الجميع المغادرة حتى لا يحدث صِدام بيننا و بين اخواننا العسكريين .. لاحظ الكلام بالفيديو الثاني و المتحدث بالندوه يزيد النار حطب و يشيّش الناس على التمرد و مع هذا القوات الخاصه كانت واقفه من غير ضرب لكن ما تم الضرب إلا بعد تحدي الجمهور لهم و لاحظو في الدقيقه 3:07 صراخ الجمهور بوجه القوات الخاصه و تدافعهم و هذا اللي أدى الى ضربهم ..

و في الفيديو كان يزايد بالكلام و ما كان يتكلم عن خروج الجمهور بالعكس كان يتحدى المتواجدين من القوات الخاصه و قالهم احترمونا نحترمكم و قعد يهايط على كرامه الناس و ان الداخلية انتهكت حرمات المنازل و اجتماعاتهم الخاصه يعني مو جذي يجذبون على الناس يا نائب يا محترم أول مره ادري ان الندوات السياسيه اجتماعات خاصه !!

ثالثا و الأهم من هذا كله، سؤال واحد فقط أوجه لأي شخص يفكر ان يصدق الحربش في كلامه ..

السؤال من هم القوات الخاصه؟ هل اهما من العراقيين و الا البعثيين و الا الحوثيين و الا الارهابيين و الا طالبان و الا منو !!

هذيله مو عيال الكويت !! مو عيال ديرتنا ؟ مو هذيله اللي يحفظون أمننا و أماننا ؟

هل واحد فيكم يصدق ان عيال الكويت ممكن انهم يدشون على ناس بالندوه من غير سبب و يضربونهم منّني و الطريج؟

ليش ما انقول ان النواب الأفاضل تعمدوا القيام بهذا كله علشان يصيير الاشتباك و يلقونها حجه انهم يستجوبون رئيس مجلس الوزراء؟

على فكرة آنا مو من مأيدين رئيس مجلس الوزراء لكني ضد المهزله اللي صارت و ضد كل واحد ظالم و غشاش ..

آنا ضد التلاعب بالحقائق و الظهور بمظهر المظلوم حتى لو كانت الحقيقه عكس ذلك ..

المسأله بكل بساطه كان من الممكن انها تنتهي بمجرد اعطائكم الأوامر بعدم اقامة التجمعات خارج المنزل انك يا الحربش المصون اتدخل الناس داخل أو تعتذر للموجودين انهم يغادرون و تتعاون مع وزارة الداخليه و ما تتحداهم بهالطريقه لأنك قاعد تتحدى أمن الديره ..

و بعد هذا تقدر انك تناقش بالمجلس قضية منع التجمعات اذا كنت ضدها بكل هدوء ..

كان من الأولى لك تهدئة الجمهور بدل التهديد و التوعد و التصرف كأن الداخلية طوفة هبيطة و تتحداهم بهالطريقه ..

انت تحديت الداخليه قبلت التحدي، هم لديهم أوامر من أمير الدوله و انت ماذا لديك؟

آنا ضد الحد من حرية الراي لكن اللي أمر فيه الأمير حفظ الأمن و واضح ان اصحاب الندوات ما يقدرون يحفظون الأمن فيها ولا يقدرون انهم يحمون المتواجدين فالداخليه تدخلت للحد من هذا الشيء و بكل بساطه قالولكم ندوتكم داخل بيوتكم ليش العناد الزايد !!

Anfal

فوز منتخبنا ..مو مصدقين؟

آنا الظاهر الفتره اللي كنت منقطعه فيها عن الكتابه ارجعت عليي رادّي هههه

اتكودت المواضيع و صرت مادري اتكلم في شنو و الا شنو ..

المهم اللي الحين رديت علشان اتكلم عنه اهو منتخبنا العزيز و فوزه بكاس الخليج ..

طبعا بتقولون اشفيه هذا بعد يحتاج موضوع؟ اي يحتاج موضوع بس أول شي مبروك لكل الكويت و عسى انشوف الكاس اللي اكبر منّه يارب و ما قصروا شباب الازرق الشقرديه ..

الشاهد ..

بطلت التلفزيون قبل شوي ابي انحاش اشوي من الاخبار اللي تدبل الجبد جان تطلعلي المغنيه الشمحوطه يارا اللي يايبينها اتقيم حفله اهي و ربعها المغنيين علشان فوز المنتخب ..

آنا مادري هالناس هاذي شلون اتفكر؟

يبا الله بالخير المنتخب فاز و استانسنا و ناقزنا و احتفلنا و صفقنا و شعور لا يوصف ..

لكن البهرجه اللي صارت بعد فوز المنتخب حق شنو بالله؟

يبا والله فشّلتوننا آنا ادري انكم مو مصدقين و حتى احنا مو مصدقين بس عالأقل مثلوا انكم مصدقين ههههههههه

انزين سويتوولهم حفله بالاستاد و كثر الله خيركم ما قصرتو و ما قصرو أهل الكويت احضروا و سوو مسيرات و كل شي .. فـ ليش حق شنو حق شحقه مسوين حفله يايبين يارا متشخلعه عالمسرح و اتغني حبيبي و بحبك و خرابيط زايده علشان المنتخب فاز !! مادري شنو علاقة المنتخب في يارا !!

انزين اضعف الايمان دام ان فيكم رقصه و ما تقدرون تقعدون راحه و تبون غناوي جان يبتو نوال الكويتيه أو رويشد او من هالمغنيين الكويتيين يغنون عن الكويت و المنتخب بس ياراااا !! باطه جبدي هالياراا لأن مالها شغل بالموضوع لااا إهي ولا ربعها اللي يابوهم ..

لاااا و تعالوو شوفوا جم قاطين عليهم على هالحفله الخربوطية ..

على طاري جم قاطين ..

آنا قررت اصير لاعبه بالمنتخب ههههههه

جوود تضبط معاي و أمليِن "كنايه عن اني اصير مليونيره"

عيال الشهيد اتبرعوا حق المنتخب عليهم بألف عافيه، ناصر الخرافي تبرع عليهم بالعافيه، الأمير و البنك الوطني و و و.. عليهم بألف عافيه .. بس آنا باطين جبدي اللي رجل اعمال متبرع شكو؟ و الا الضحك المهندسه اللي متبرعه هاهاهاهااهاهااا يبا شنو موضووعج اذا فلوسج زايده وزعيها على الشعب ترى أولى فيها ههههههههه

لا والله صج ترى لو شايفين كارثه صايره جان ما سمعنا هالكثر تبرعات و مساعدات جنه اللي يقول الحين شباب المنتخب طراروه ماعندهم هدوم يلبسون مساكيييين ...

آنا اقول وزعوا فلوسكم على ناس محتاجه وايد احسن من القط من غير معنى و اللي مسوين حفلة المنتخب ما اقولهم غير مالت على الباميه و على المسؤول اللي حاطكم في مناصبكم و السامع يقول آمين و السلام عليكم و رحمة الله و بركاااته ..

Anfal

الله يستر !!

قاعدين نسمع اخبار من هني و هني عن مداهمة القوات الخاصه لندوة الحربش ..

والله اني صارلي دهر منحاشه من السياسه و صار عندي تلبد من كثر البلاوي اللي تصيير بالديره قام ما يهمني ولااا احرق دمي مثل الاول ..

بس اللي قاعد يصيير اليوم و اللي صار بالايام القليله الماضيه شي يخلي الصخر يتكلم ...

والله ان الوضع بالديره مؤسف و أقولها من كل قلبي لاااا بارجت فيكم من نواب ولاااا بارجت فيكم من حكومه ...

احنا الكويتيين عييل جذي يصيير حالنا !! وين كننا و وين صرنااا والله حسافه على هالديره اللي باجر بتنمحي و السبّه هذيله اللي ما عندهم إلا اللهم مصلحتي ..

ليلحين ما بيّن شنو اللي صار بالضبط بالندوه لكن اللي اشوفه ان النواب غلطانين من راسهم ليي ساسهم و هم بعد الداخليه مو مقصره بالغلط بس يمكن الداخليه كان عذرهم أقوى باللي سووه ..

آنا ما أأيد العنف بكل أشكاله و لااا أأيد الداخليه في الطق اللي صار لكن يا نواب يا أفاضل ليش اخالف القانون و أعصّب اذا الحكومه اتصرفت بناءا عليه ؟

الأوامر يت من الأمير بمنع اقامة التجمعات الخارجيه و التحذير وصل للحربش و يقولون ان انصاع للتحذير معقوله على كلامهم القوات الخاصه دشّت عليهم من غير لا يخالفون القانون ولا يغلطون و طاحت فيهم طق و تمححط منّي و الطريج !!

مستحيل النار ما تبدي الا قبلها شرار و القوات الخاصه ما اتدخلوو الا من اعنادهم الزايد و تجمعهم خارج الندوة ...

لكن العتب اهني على الداخليه في ضرب النواب، آنا ما اشوف ان النواب أحسن من الباجي لكن النواب يمثلون ناس و مؤيدين وراهم بالآلآف و ضربهم راح يثير حفيظت مؤيديهم و ممكن انهم يتصرفون تصرفات طايشه ردًا على ما قامت به الداخليه ...

الخوف من ان الديره باجر تنقلب و تقوم الناس عالحكومه و ساعتها ماراح ينفعنا لا الطبطبائي و لااا الحربش و لااا ربعهم لأن الطق صج وقتها بيصيير حلّلاي و الله يستر اذا ما انحل هالمجلس بلاااا رجعه !!

و طبعا ما يحتاي اذكر اللي صار قبلها في ندوة السعدون و طق الجويل من قِبَل مجموعه من الـ "هَمَج" !!

والله هالندوات مو قاعده اتييبلنا غير البلاوي و آنا أأيد الحد منها لكن بالنهايه مححد يقدر ان يمنع حرية الراي ...

من كثر المهزله اللي قاعده تصيير قمت احس ان الحق بهالديره مخلوط مع الباطل و ما عااد الواحد يفرّق بينهم ...

الكلمه الحين للنواب هدّو اللعب و خلكم خوش ناس و منتوا فوق القانون علشان تتحدونه و اذا فيكم خير المفروض انشوفه الحين بهالوقت اللي محتاجين فيه ذرة أمل ان الديره ممكن تتعدل ..

والله يهّدي النفوس ..

Anfal

جامعــــة الكويت

الأمس..اليوم..و غدا إن شاء الله

ما أشبه اليوم بالأمس، بالأمس كنت قد تخرجت من المرحلة الثانوية و أتذكر جيدا فرحتي بذلك اليوم و سعادتي بما حققت و أنجزت، و اليوم مشاعر السعادة التي شعرت بها سابقا بدأت تتدفق في أحاسيسي مرةً أخرى، ما أحلى هذا الإحساس و ما أحلى هذه الفرحة.

خمسة سنين قضيتها في جامعة الكويت هي أشبه بالحلم، دخلت الجامعة شخصا و خرجت منها شخصا آخر، فهي ليست مجرد مراحل دراسية و ليست مجرد منهج نتعلم منه و نتركه، لكنها مراحل من التعلم و الخبرة و النضوج ليس أكاديميا فقط، و لكن حتى في جميع أمور الحياة صغيرةً كانت أم كبيرة.

في أول سنة دخلت فيها جامعة الكويت كنت كالطفل الذي بدأ خطواته الأولى في السير، أتعثر تارة و انهض لأعاود السير من جديد لكن الأهم في هذه المرحلة كانت التعرف على حياة جديدة لم أعهدها من قبل و محاولة الاعتياد عليها و الالتزام فيها، بدأت اهتم في استقلاليتي و محاولة النضوج في تصرفاتي، و كنت قد اخترت دخول كلية الآداب لأن رغبتي كانت دراسة اللغة الانجليزية التي أحببتها كثيرا خلال دراستي في المرحلة الثانوية، بعد السنة الأولى درست مادة مدخل الإعلام و هذه المادة هي التي غيرت طريقة تفكيري و هي التي جعلتني أتجه لتخصص الإعلام، فهناك دائما في حياة الشخص نقطة تغيير، و هذه كانت بداية انطلاقتي بالتغيير في حياتي عندما قررت بعد أن أخذت مادة مدخل الإعلام و بعد أن استمتعت فيها كثيرا و زاد عندي الفضول لمعرفة المزيد في هذا المجال أن أغير اتجاهي و أتخصص إعلام و أترك اللغة الانجليزية للتخصص المساند، أكملت مسيرتي الجامعية و كل سنة تمر كنت أزداد فيها حماسا للسنة التي تليها.

و ها أنا ذا في السنة الأخيرة و على عتبات التخرج أنظر خلفي لأرى أحلى سنين حياتي قد مضت، و أنظر أمامي ليزداد اشتياقي للسنين القادمة و ما تحمله لي من مفاجآت، أحزن تارة على ترك أحلى ذكرياتي على أبواب الجامعة، و أفرح تارة لبدء حياتي العملية و تحقيق طموحي.. أو فلنقل جزء من طموحي.. فإتمامي لمراحل الجامعة ليست هي النهاية إن شاء الله، و لكنها مجرد البداية لتكملة مسيرة دراستي، التي بكل ما تحمله من تعب و جهد و ضغوطات إلا أنها من أجمل ما قمت به في حياتي، فما هو الإنسان من غير العلم، و ما هو العمر من غير التعب، و ما هو النجاح من غير التطلع لنجاحٍ أكبر منه.


10/6 آخر يوم أخرج فيه من الجامعة و أنا طالبة فيها، كم أتطلّع لهذا اليوم الذي اعلن فيه عن نجاحي، و كم أرفضه من داخلي و لا أتمنى أن يأتي، فهو اليوم الذي يُعلن إنتهاء آخر أيامي في أحلى سنين عمري، لكن السنين قادمة و ربما يأتي أجمل منها لينسيني حزني اليوم على فراقها ..

جامعة الكويت.. لن أنساكِ ما أبداً، و لن أتركك ما حييت، ستظلين معلمتي الكبرى، ستظلين الحب الأول و سأظل ابنتك المخلصة ..

كلمة شكر لجميع أساتذتي اللذين تربيت على أيديهم ..

أخص في الذكر منهم د.أنس الرشيد الكبير في تواضعة ..

من قسم الإعلام ..

د. تغريد الملا .. تعبنا لكن فعلا تعلمنا..
د. ياسين الابراهيم .. متعة الابتسامة ..
د. هبه المسلم .. نِعم الأخت ..
د. بدر الحجي .. معنى الطيبة ..
د. أحمد دشتي .. النقد الممتع ..
د. يوسف الفيلجاوي .. الكبير ..
د. نبال بورسلي .. الجدية و التعليم ..
د. ماهر الحجي .. كفيت و وفيت ..
د. أحمد الشريف .. رسمت بدايتي ..
د. عبدالباسط عبدالجليل .. الشرح الجميل ..
د. هشام مصباح .. علمتنا الكثير ..
د. حسن مكي .. علمتنا الاعتماد عالنفس ..

من قسم اللغة الانجليزية ..

د. محمد علي .. متعة المناقشة ..
د. لميس البستان .. اختلفت معاج لكن لا انكر فضلج ..
د. رافع الزعبلاوي .. تعلمت منك الكثير ..
د. خالد الجنفاوي .. قمة الاحترام ..
د. عبدالعزيز العبداللة .. و نعم الدكتور ..

من الأقسام الأخرى ..

د. أسيل العوضي (الفلسفه) .. متعة لا حدود لها في النقاش ..
د. محمد الوهيب (الفلسفة) .. فعلا غيرت تفكيري ..
د. فوزية عبدالله (العلوم) .. ما قصرتي ..
د. رشيد العنزي (الحقوق) .. قمة التواضع ..
د. عبدالله الرميضي (الحقوق) .. تركت بصمة ..
د. عبدالله الغزالي (اللغة العربية) .. محاضرات جميلة ..

و لا أنسى أخيرا جميع زميلاتي و زملائي فعلا الجامعة بدونكم سلطة :)



Anfal

المواطن و المتواطن

للأسف ان كثير من الناس يخيَل لهم انهم مواطنين اكثر من غيرهم وانهم يحبون الوطن والكويت اكثر من غيرهم وهذا شي يقولون ويحاولون يظهرونه بالشعارات والهتافات .. لكن نسوا او تناسوا هؤلاء الشرذمة واللي من بينهم نواب انه حب الوطن يكمن في التشريعات اللي تفيد المواطن وليس المتواطن و حب الوطن موجود في الامانة بالعمل مو الساعة 12 طالع من دوامك ومخلي القرعة ترعى ..

محد يزايد علينا في حبنا للكويت ولحد يزايد علينا في ولاءنا لهالديرة الطيبة واهلها الطيبيين لكن ما نسوي مثل ما يسوون انه نبين حبنا اكثر من غيرنا .. ترى هالشي يكون محمود لما يتطابق قولنا مع فعلنا لكن نسمع الحجي والفعل ماميش هذي شي مذموم وخصلة فاسدة في الانسان .


طبعا بحكم دراستي في الخارج فانا المفروض أكون مشغول لكن ولله الحمد متابع لأوضاع الديرة السياسية أول بأول بس الواحد صار ماله خلق يعلق على كل شي لأنه قامت تطق جبودنا من الأوضاع اللي صايره ولو بتقول رايك بشخص بيقولون أنت مع الشخص الثاني ولو تقول رايك بالموضوع بيطلعون ناس مثل الببغاء يسمعون القنوات ويردون عليك ولما تحاججهم يسكتون فخلنا ساكتين عن أوضاع الديرة ونقول الله كريم

أبارك للمواطن وليس المتواطن محمد الجويهل خروجه بكفالة ولكن لا أبارك للناس اللي وضعوا من الجويهل رمز وطني يا جماعة الخير موضوع حصل ووجهة نظر اختلفوا فيها أشخاص وحصلت قضايا عليها لكن للأسف نشوف التكسب السياسي من هالموضوع من قبل نواب ومواطنين اللي ما همهم ألا الكرسي الاخضر وشلون يوصلون له لكن بالنهاية يظل الجويهل يدافع عن قضية أنا من ناحيتي أشوفها تفيد الكويت وتكشف شريحة ولاءها معدوم والقانون صريح في هالنقطة .. فأتمنى أنه هالموضوع ينتهي المزدوجين ونطويه مع أنه الملفات صار لها سنين تنعلج ما تنطوي ..

بالنهاية ما نقول ألا الله يحفظ شعب الكويت من كل شر ..

Kefy_Q8y

حسبي الله عليك يا بو رمية جانك بتقلب الديره عليننا

آنا ماني عارفه اللي ينقال له بو رميه هذا شنو هدفه بالدنيا ..؟

طلعلنا بسالفة القروض و شط عمره علشان يطيحون قروضه و المساكين اللي عليهم الف و الفين ما يدرون ان قروضهم ما تساوي شي عند قروض الأخ العزيز اللي قاعد يطالب باسقاطها و ما يدرون ان كل هالحماس علشان مصلحته ..

خلينا سالفة القروض طلعلنا بسالفة البدون ..

أول شي آنا مو ضد حقوق البدون و بالعكس آنا مع اعطائهم حقوقهم لأنهم بالنهايه بشر حالهم حال أي هندي و الا مصري له حقوق و سفارة يلجأ لها متى ما احتاجها ..

مشكله البدون متشعبه و عويصه على قولتهم و اعتقد ان كل حل أمر من الثاني لأن البدون اللي فعلا يستحقون التجنيس قليلين مثل ما كلنا انعرف و الباجي كلهم لفوو عليننا من هالدول القريبه ..

شلون انفرق بين الأثنين ماني عارفه الصراحه و شلون نقدر ان نعطي المستحقين و نفصلهم عن الحوش الباجي هم ماني عارفه ..

و شنسوي في عوير و زوير اللي قطو جناسيهم و يوننا مادري .. انقطهم في البحر و الا انحطهم في صاروخ و اندزهم القمر ..؟

المهم مو هاذي سالفتنا ..

سالفتنا بو رميه اللي مسويه نفسه المدافع عن الحق و تصريحاته بحشد 100 الف بدون في ساحة الاراده للضغط على الحكومه ..!

ما ادري هالبو رميه هذا شنو ناوي عليه اللي بيمّع 100 الف بدون عند المجلس ..

الصراحه زين ما سوو الداخليه لأن من المعروف ان عدد مو قليل من فئة البدون "خريجين سجون" و هالشي ما عرفته باحصائيه لكن الجرايم اللي انشوفها يوميا من سرقات و غيرها البدون يلعبون فيها دور كبير و طبعا آنا اتكلم عن البدون الحوش مو اللي يستحقون و انظلموا ..

فـ شنو نتوقع من 100 الف شخص من هالفئه في مكان واحد و شنو ممكن يصيير ..؟

الداخليه عندها معلومات بأن ممكن تصيير تفجيرات و هالشي مو غريب اذا فعلا صار هناك حشد لأن في ناس مو خسرانه شي و اذا كانت اصلا عليه قضايا و بلاوي ف حياته اصلا مو هامته سهل عليه ان يقوم في مثل هالاعمال ..

و حتى لو ما صار تفجيرات احتمال كبير تصير مشاجرات و مشاكل و هذا شي مو مستبعد كلش ..

فـ الله يحط كيدهم في نحرهم و الله لا يوفقك يا بو رميه اذا ناوي تزعزع الأمن عندنا ..

و الله يحفظ الكويت انشالله ..

Anfal